بالعتم شفتك بين عيني
مضوي يا ضو الزنبق عليي
وغرقت فيي بلحظة الأفراح
مثل باقة ورد بالميي
ولما العطر للعطر سرو باح
وسقيتني دمعات عطريي
من هل عبير شربت جوز قداح
وذوبت حنيني بحنيني
ونمت فيك شوي تا إرتاح
ولما وعيت لقيت صبحيي
منك بقي عليي متل ملاح
غافي عا أعشاب الربيعيي
ولما عليي الفجر نورو لاح
هربت منو وجيت عالفيي
تيضل فيي عطرك الفواح
وما ينشفوا تيابي لعصريي
وشميتك بحالي وخيالي ساح
وعالجوع غنى الشوق غنيي
راح ليلي يا حبيبي راح
وناطره ترجع بتاني ليل
وتشوفني بعدو الندي عليي
مشتاق لشفافك تحاكيني
بغربي حزيني عم تبكيني
وكيف بدي بغربتي ارتاح
واكتر من الغربي جرحتيني
ومن بعد سهراتي الملاني قداح
صار مكتوبك يغفيني
وصوره متل طفلي بقلب زياح
عم قلها بكير وعيني
وزهره من تيابك شذاها فاح
كنتي تلبسيها وتنطريني
وكانت بايدي عن قمر تنزاح
لما يقلي دخلك سقيني
هيي معي وكل ما انطفى المصباح
عم قلهاعا النوم لاقيني
جوعان بدي عطرها الفواح
مطرح ما علم وردها عليكي
من ريحة الأحباب طعميني
يا مين ع شحاد يهديني
منشان سرّ الكار يعطيني
لا مال بدّي ولا برزق طمعان
ولا مقصدي ضيعة ولا مديني
بدّي عصا من قرمة العميان
اتعكّز عليها بتكفيني
وادّروش وأبرم على الجيران
وع كل عتبه ينحني جبيني
شحاد بشحد عاطفة وتحنان
من اللي جرح قلبي وناسيني
وبتنهنه بغصّة طفل عطشان
قلبي احترق يا ميمتي اسقيني
شحاد بشحد كحلة الغزلان
من عيونك اللي فيهن قتلتيني
وبشحد لك الغفوي من النعسان
حتى تنامي يا تقبريني
وبطلع على بشري حمى جبران
بقلّو ع سلمى دخلك هديني
بحبش ونبّش بهالجدران
ع شي عبارة حبّ ترضيني
وبرجع وبستنّى شهر نيسان
وبقول بكرا الخير جاييني
بشحدلك من الورد والريحان
ووين ما دعستي تقشعي زيني
وبكتب من الإنجيل والقرآن
حجابات فيها دينك وديني
بلكي بتجي وبتطردي الشيطان
واللي حضى يعقوب يحضيني
قبلي وبعدي ما انظلم انسان
ع قدّ ما بحبّك ظلمتيني
لو كان قلبك من صخر صوّان
حلّو يلين الصخو وتليني
وراضي لا والله مش زعلان
وأعوام بقبل لو حكمتيني
ع شرط إنت تفصّلي الأكفان
وإبقي ع قبري بالسنة مره
حسنه لوج الله زوريني
بصرتك بنومي قال عم توعي
من سريرك المشدود بضلوعي
وعم تزحطي رح توقعي عنو
غمرتك بلهفة تاخدر كوعي
وخاف توعي وتفلتي منو
ستنجد بقوة مارد ولوعي
ووعيت وحناني فشل ظنو
ومش غامرك غامر وهم جوعي
قصائد غزل وحب 
