من كتاب ربيع الخريف -الشاعر المرحوم علي شعبان وابنه الشاعر شوقي شعبان

بشار · #1 01-08-2005

من كتاب ربيع الخريف -الشاعر المرحوم علي شعبان وابنه الشاعر شوقي شعبان

--------------------------------------------------------------------------------

حكم هالكون كم طاقم بطاقم...........وما قدروا فرصة العدل استغلّوا

بحكي ناعم متل جلد الأراقم...........وسموم القاتلة بالجسم غلّو

ونحنا شعب عالأوضاع ناقم..........حلّو يرجع سليمان حلّو

يفتح كل أفواه القماقم..................ويحبس كل عفريت بمحلّو

علي شعبان

بشار · #2 01-08-2005

قصيدة للشاعر علي شعبان ألقيت في مدينة عاليه في حفلة أقيمت لجوقة لبنان الأخضر

--------------------------------------------------------------------------------

يا عروس الصيف يا أم البيان..........فهرس التاريخ من مجدك ملان
طرحتك عكمامها ضحكو الورود..........وعاذيالها سكرت قمار الأقحوان
في نحرك نجوم السما نزلت عقود..........وعن وجنتك مصنوع لون الأرجوان
ومن ثغرك العنقود عسّل بالجرود..........وعا جبينك استسلم سلاح العنفوان
************************************************** *************
واليوم شعار الزجل جاءت وفود..........يقيمو بعرس الشعر أكبر مهرجان
شعار نحنا محررين من القيود..........عملنا بجو اللا نهاية امتحان
الشعر مش منبر خشب خرج الوقود..........ولا نقر دربكي عا كرسة خيزران
نحنا كراسي شعرنا صنع الخلود..........ومنبر قوافينا من لواح الزمان
************************************************** *************
تمرجح يا شعري في خيوط الابتكار..........وحمم ظلام الليل في فجر النهار
وعبي القدح كوثر قوافي وسلسبيل..........ودغدغ بنات الفكر في بكر الحوار
شفنا حمام الشعر بلّش بالهديل..........وحسون غط جوانحو وحسون طار
تحرر زجلنا من نطاق المستحيل..........والفن ما بيخضع لرسم الاحتكار
عن شرط ما منقبل هزيل ولا دخيل..........يشوّه جمال الشعر ويغش البذار
في ناس عم بيقدّرو الشعر الجليل..........مجد وبطولة واعتبار وانتصار
مظبوط هذا: انما الشعر الهزيل..........رخص ومذلّة وابتذال وانتحار
يا مناصرين الشعر انتو قوت جيل..........خلاّق ما بيعرف طريق الانحدار
شجعوا جوقة بعين السحر ميل..........بلبنان أخضر لا رياح ولا غبار
حتى نبوع القافية الحرة تسيل..........وتنبت بصحرا الفكر مرجة اخضرار

بشار · #3 01-08-2005

طليع : (افتتاح)

يا ليل طفيني أنا شعلان..........ورشرش بعينيي حلم بردان

ونهدات روحي صيغها عصافير........وقلّها طيري بسما لبنان

جينا يا رملية بقلب كبير..........عا أرض مقلع جوهر ومرجان

ولو هيك كل الرمل عم بيصير..........من الرمل شلنا كحلة الأجفان

ويا أبو غسان عن تقدير..........قصدنا المضافة ال مجدها عمران

ويا هل ترى من بعد هالتأخير..........ما قلت مش جايي طليع حمدان ؟

لا لا , على درب الوعد منسير..........ومن دون وفا شو لذة الفنان

شو لذة العصفور لما يطير...........من دون شوق ان غط عالاغصان

شو لذة الرسام بالتصوير...........من دون لهفاتو على الألوان

شاعر أنا وعملاق بالتفكير........وحيث الاكل طيب انا وجوعان

نحنا نطرنا تا نجوع كتير.........منشان نكسر جوعنا ونشبع

......................عا غلّة بيادر علي شعبان..................

شوقي : ( افتتاح)

أهلا وسهلا في ابو شادي............هيدا زميلي البلبل الشادي

نحنا ربيع الفكر بالالوان..............حيّكلنا من الفل سجادة

نحنا جماعة من بني شعبان.........شهور القمر النا عم تنادي

وبين الشهور بينحسب شعبان.......أول طريق الفتح للهادي

وانتو جماعة من بني حمدان........أحرار ما بتغيرو العادي

التاريخ مع فارس بني حمدان.........باسم الرجولة حملو شهادي

شعّار نحنا وفي لنا ميزان................قبّو عميزة عقلنا هادي

أشعارنا بسفح الجبل عنوان..............والغيم تحت شرودنا رمادي

وأفكارنا بالسهل والوديان..............محضرّه للنحل زوّادة

شعّار نحنا وفي لنا أيوان...............شامخ على كتاف الجبل هادي

واليوم في حفلة أبو غسان................الحظ غيّر دورة التاريخ

.....................ونزّل جبال الشعر عالوادي................

يتبع

عمر · #4 01-08-2005

شكراً كتير بشار القصايد روعة ............ بس منتمنى تصير تنزل شي من حفلاتك إنت

شفيق · #5 01-08-2005

حلو يا بشار ,,,,,

والله على هالاسم ما أحلاه

ربيع الخريف

بشار · #6 02-08-2005

طليع :
شوقي اسم بقلوبنا وانغامها..........من بيت صان الفلسفي وأعلامها
وحتى الزهور البعدها بأكمامها...........لولا ما لذعت شوقها وهيامها
حبال الشمس ما سحّبت منها الخيوط.........وما تفتقو بعرس الربيع كمامها

شوقي :
حمدان عيله وفي لها مركز رفيع............تاريخها بيشيب الطفل الرضيع
وشعبان عيله مجالها مخضرم وسيع.........وبرجها هيكل قوي محصّن منيع
ومهما حكو وبحقنا يهجو الجميع...............منبقى رعاة الشعر والباقي قطيع
نحنا بحروب الشاعرية يا طليع..................مناكل طحال أسود ومنشرب نجيع
فصل الربيع مشبّعو الله جمال ..................ونحنا بأريج الشعر شبعّنا الربيع

طليع :
شعرك يا شوقي من الربيع المخملي...................من خيوط قالت يا مغازلنا غزلي
ولو كفّنا طبق شظايا القنبلي............................وسيطر عمجد الاخرة والاولي
وعا شعرنا لو فتحوا زرار الربيع......................منبقى براعم شعر بجنينة علي

شوقي :
يا طليع عندك قوافي معتّقه.............بتعبير ألين من عروق الزنبقة
شعرك قصيده مروتشي ومزوزقة......العطشان منها حروف ابداع استقى
وتارك بحفلة بيت مري أكبر دليل........ومعلقه لليوم باقي معلقة

طليع :
شعرك يا شوقي من الاريج العنبري..........ختيار بالتفكير وبقلبك بري
وفي بيت مري تركت القوافي تنذري...........وقلت لم جواهري يا جوهري
وكل كلمة من كلامك شفتها......................مزروع فيها مجد حفلة بيت مري

شوقي :
تمخض يا فكري وانت عبر يا لسان.........وللشاعرية كون اكبر ترجمان
جينا عا حفلة نادرة نصيغ البيان..............نعلّق حلق افكارنا باذن الزمان
بيدر قوافينا من الحنطة ملان................بيسد جوع الموهبة بمطلق مكان
شوقي وطليع بذار من خاص الحبوب.......وبالامتحان بينعرف رخص الزوان

طليع :
شوقي قصيدة بلحن روحي ملحني...........واوتار عا همس الحياة مدوزني
انت وانا الحبات عا بيدر غني................وما زالها للشعر جوعاني الدني
حتى الليالي ياكلونا ويشبعوا................انشالله منتلاقى سوى بالمطحنة

شوقي :

يا طليع منعرفك شاعر وفي.............تشارك معي تا نفضح السر الخفي
يا نكبة العقل وعويل المعرفة.............بشعار جهل تسترو بالفلسفي
ومنشان ما نخلي الحقيقة مكتّفي..........المفروض تشبك موقفك مع موقفي
حتى العدل يكشف نوايا المجرمين..........الباعو القوافي في جهالة صيرفي

يتبع