إلى أهالي مشتى الحلو والقرى المجاورة الكرام ,,,((حفل توقيع كتابي الأول)))

شفيق · #1 11-07-2005

مرحبا

نتشرف بدعوتكم لحضور حفل توقيع كتاب ((أسرار الورد )) للشاعر شفيق ديب ,,,

برنامج الحفل ::

الشاعر اللبناني الكبير أسعد سعيد

الشاعر أبو علي البلوداني مصطفى الحسين

الشاعر سمير هلال

الشاعر حسان البسطاطي

الشاعر شفيق ديب

عريف الحفل الشاعر بسام البسطاطي

_المكان :::دير السيليزيان مشتى الحلو

الزمان :: 16 /7/2005 ,,,السبت ,,,الساعة 6 مساء ,,

ويلي التوقيع حفل كوكتيل ,,,

وللاستعلام ,,مراسلتي على الخاص,,,,

عمر · #2 12-07-2005

شاعر بالكلمة تعلى ............ الكلمة نالت إعجابو
الله يباركلو اللـــــه................... بحفلة توقيع كتابو

يا مشتى تتهني بزف ................ شاعر في شعرو تجلى
شفوق بينحط بصف ................ أرفع شعرا بتتعلى
وبسهرة خشات الدف ............... نشالله هالدنيا كلا
حول الدير يصفو صف ............. يشوفو المبدع بشْبابو

سر الورد وسر الفل .................. بكتاب المبدع حطو
وطيور الإلهام تطل ................. وببحرو ياما غطو
ومرسى الشعرا ما بيحل ............ إلا عابحرو وشطو
ولما عليه الوَحَي يغل ................. بيفرح في دقة بابو

ramroum · #3 12-07-2005

ريتو ألف مبروك ياشفيق

نشالله تشوف بـ كتاب ((أسرار الورد )) ..كل النجاح

بس خسارة انا مو بالمشتى

..نشالله ع الكتاب التاني كون موجودة

موفق

شفيق · #4 12-07-2005

شكرا كتير يا عمر على هالكلام الحلو وهالشعر الرائع ,,,,

وبتمنى تكون موجود بالتوقيع ,,,

وشكرا كتير يا ريم ,,وولا يهمك بحفلة التوقيع الجاية انشالله بتكوني ,,,

شفيق

**echo** · #5 12-07-2005

ألف مبروك شفيق سلفا على حفلة توقيع الكتاب

رح حاول أنزل أحضر الحفل إذا ماكان عندي شي

تحياتي

محمد حسن شريم · #6 12-07-2005

قالو الورد بــالعُطُر شو صابو ______ فايح تـــــامنّو حقولنــــا طابو
قلتلهن عن سبـب كل ال صار ______ بكتـــــاب ديب لقيـــت أسبابو
ديب عــــــاكتابو رقــص نوار ______ فرحه عند مــــا راجع حسابو
لما عاأرضو حمّلــــت الأنهار ______ يلي سقى مـن خيرهـــا تـرابو
بكتاب ديب انعجنـــــت ألأفكار ______ في معجن الإحساس وصحابو
وبنت الشعر يلــي عليهــا غار ______ غيرة أسد لـــــو هاجمو غابو
هوي البنت عاشق خلق والنار ______ حارقه قلبـــــــو وأعصــــابو
وهيك هيي قلبها مـــــــا احتار ______ وتنينهن فــــي بعضهـــن دابو
وما كان كاتب "للورد أسرار" ______ لـــــــوما شفيق يكون بالإلهام

____________ كاتب عابنت الموهبي كتابو ____________

ree7-zzajal · #7 13-07-2005

أول شي مبروك
وتاني شي اذا سمعت انو موضوع الحدود تحلحل لح بتقشعني قدامك شخصي ..

فريد

شفيق · #8 13-07-2005

شكرا كتير للشاعر الصديق محمد حسن شريم ولطوني وللاستاذ فريد ,,,

ويا طوني لازم تكون بالحفل لأنو بحب أنو اتعرف عليك ,,,

والاستاذ فريد بتشرف بحضورك ,,,

شفيق

حسن بنوت · #9 13-07-2005

المكتوب قالو من غلافو بينقرا
هيدا حكي مظبوط عن حق وحقيق
وللشعر اٍنت الجوهره يا جوهره
وكتابك مأكد عقيق على عقيق

ألف مبرك وعقبال التاني والتالت والرابع وحسوب حسابي بنسخه امضيها سلف.

**amigo** · #10 14-07-2005

كرت انيق لعنوان كتاب رائع لحفل وللا احلى ان شاء الله بتوفيق يا شفيق ع قبال ما تفرح بأخواتو

**echo** · #11 14-07-2005

أهلين شفيق رح حاول جهدي أنزل على السلزيان و شوفك

تحياتي

Mr. Samo · #12 14-07-2005

مبروك شفيق و انشالله من حسن لاحسن

و رح نحاول نكون معك بهالمناسبة الحلوي

بشار · #13 15-07-2005

الله يوفقك شفيق , ويهنيك بحياتك وبمجال الشعر بالذات , وبقلك من قلبي الف مبروك والى الامام , ويا ريت بيجمعنا القدر لنغني سوا.
عندي طلب اذا ممكن تنزّل صور الحفل عالمنتدى منشان نكحّل عيوننا فيك.

شفيق · #14 15-07-2005

شكرا الكن جميعا ,,,,

حسن ,رامي ,طوني ,سامو ,بشار ,,

واللي بيقدر يجي لا يقصر ,,,

ويا أخي بشار الغالي رح نزل صور انشالله ,,,

وأخي حسن الغالي ببعتلك نسخة وين ما كنت ,,,

شفيق