الموشح

[Romel]

[size=]يرجى من المشركين الكرام المشاركة معي في هذا الموشح:


كلما يزورِك شي مرّة.......الفادي المحبوب
بيوصل عا صدر معرّأ.......بيرجع مصلوب


يام الخد النيساني.......وسهام العين
عملتي من جروحي قناني.......وين وعدِك وين
بودّي قصايد و غْناني.......و ما بتوفي الدّيْن
إلا بوردة دبلانة.......بشقفة مكتوب


ابراهيم
[/size]

[انهل دبس]

كِلما يزورك شي مَــــرَّة ــــــــــــ الفادي المَحبوب
بْيوصَـل عا صّدر مْعَـــرّا ـــــــــــ بْيرجَـعْ مَصْـلـوب

صَدرك مَرمَر مِن بَــــرَّا ــــــــــــ ومِن جـُوَّا كِيف
يمْـكِن نيرانـُو حَـــــــــرَّة ــــــــــــ والقـَلب ضْعِـيف
الفادي الـِّلي تـْعَـذ َّب مَـرَّة ــــــــــــ ما بَـدُّو يعِـيــــف
المَرمَر لـَو عادوا الكَــرَّة ــــــــــــ وصَـلبوا مَقـْلوب

[Romel]

بيوصل عا صدر معرّا-------بيرجع مصلوب


يلّي النحل بخدّيكي-------عم يعقص عقص

و من لون الشّال عليكي-------خلقان الرّقص

بتمنّى صير بديكي-------خزعة للفحص

حتّى فوت بعينيكي-------من المايكروسكوب!

[رامي]

بيوصل عا صدر معرا --- بيرجع مصلوب


صدرك من ريح الجرد --- تنشق ت َ فار
وفك من بلوزك بعد --- شوية أزرار
وملتي عاغمار الورد --- المحمر وصار
مطرح ما تلقي النهد --- من الحر يدوب

[انهل دبس]

بْيوصَـل عا صِدر مْعَـــرّا ـــــــــــــ بيرجَعْ مَصْلوب

يالـّلي الفادي بْيتلـَــــوَّى ـــــــــــــ يَمِين شْـمــــــال
عا صِدركْ بَـرَّا وجُـــــوَّا ـــــــــــــ وحِمْلـُو السِنسال
عْـلـَوّا يا حِلوي عْـلـَـــوّا ـــــــــــــ يمْشِي هالحـــال
تشوفي لـَحْظِك شُو سَـوّى ـــــــــــــ بقـَـلبي المَيـدوب

[انهل دبس]

بْيوصَـل عا صِدر مْعَـــرّا ـــــــــــــ بيرجَعْ مَصْلـوب

الفادي بْصِدركْ مِسْـتـَنـِّــي ـــــــــــــ يزَهِّـرْ نيســـــان
وياخـُدْ لـَ ورود الجَـنـِّــــة ـــــــــــــ مِنـِّك ألــــــــوان
عْـطيني بَوسِة بْلا مِنـِّـة ـــــــــــــ هْـديِّة وحِـلــوان
بـِرْجَعْـلِك شَـبْ انـْكَـنـِّــي ـــــــــــــ مْريض ومَعْطوب

[Romel]

بيوصل عا صدر معرّا-----بيرجع مصلوب


شفافِك خمر و زوّادي-----و طبعة بالقلب

و عيونِك أسمى شهادة-----بفنون السّلب

الفادي كان جرحو عادي-----عاخشاب الصّلب

بسّ عْلى صدرِك فادي-----بيحسد أيّوب

[انهل دبس]

بْيوصَـلْ عا صِدر مْعَـــرَّا ــــــــــــ بيرجَعْ مَصْلوب

بْعِـمْري ما رْكَعـت بْقِـبِّــة ــــــــــــ صْلاتي مَـلـَّيـــتْ
بْقِـبـِّة صِدرك يا حِـبِّــــي ــــــــــــ رْكَعْـت وصِلـَّيـتْ
شِـفتْ الفادي مِتـْخـَبِّـــي ــــــــــــ وحَـدُّو غِـلـَّيــــتْ
حاجي تـْقِلـِّي يا رَبِّــــــي ــــــــــــ عَـن حِـبَّـا تـُوب

[شادي75]

كيف الشباب؟؟
تسمحولي ؟

بْيوصَـلْ عا صِدر مْعَـــرَّا ــــــــــــ بيرجَعْ مَصْلوب

طفلك غنّا موالو ........ من جوعو وناح
غمرتيه ونهدك طالو ........ والعنبر فاح
وتا اشرب من شلالو ....... الروح وارتاح
رح جرّب ابكي بدالو ....... وأعمل ملعوب...........

---------------------------------

[Romel]

بيوصل عا صدر معرّا-----بيرجع مصلوب


كنتي تزورينا سرقة-----خلف الأنظار

صرنا تانشوفِك مرقة-----نشحد مشوار

فْكستي الخطبة عالورقة-----و طلّقتي الدّار

و ضلّ عْلى دموع الفرقة-----كتابِك مكتوب

[انهل دبس]

أهلا وسهلا بشادي الغالي وينك يا خال

بْيوصَـلْ عا صِدر مْعَـــرَّا ــــــــــــ بيرجَعْ مَصْلوب

ياام عـيون النعسانـــــــة ــــــــــــ وجْبـِينْ نـْهَــــار
لـَحظ عـيونِكْ خـَلاَّنـــــي ــــــــــــ مَحْرُوقْ بْـنـَـــار
حاجـِي عْـلـَيِّي تِقـْلانــــي ــــــــــــ شُـو تِقـْلِكْ كَـار
رُوحي صارتْ تِلـْفانـــــــة ــــــــــــ ومَاني أيّـــــوب

[Romel]

الأخ انهل دبس: شكراً جزيلا لك من القلب على هذه المشاركات الرقيقة الفذّة.

رجائي إليك و إلى جميع الإخوة بمحاولة التّقليل من تكرار الكلمة اللتي تتناسب مع قافية المطلع بين مشتركٍ و آخر.

فكلمة أيّوب على سبيل المثال قد ذُكِرت من قبل في ردّة سابقة.

و لكم منّي بالغ الإحترام


إبراهيم ياسين

[ابي سعدى]

بْيوصَـلْ عا صِدر مْعَـــرَّا ــــــــــــ بيرجَعْ مَصْلوب

قالــو ايـــدك لا تمـــــــدا ---- جـــوات العــب
بيـــا الـلـي قــاعد حـــــدا ---- تفكيرو صعــب
جفون عيونـــا من عنـــدا ---- رح تشعل حرب
سهاما إن صابو بو سعدى ---- بيرجـع مغلوب

[مروان]

كلما يزورك شي مرة --- الفادي المحبوب

بيوصل عاصدر معرا --- بيرجع مصلوب

***

يلّي بأوصافك رسمي --- وبعدِك عالبال

غابت بالغُربه البسمي --- من سنين طوال

عالنسمي بكتب اسمي --- وببعث مرسال

بلكي ان صادفتي النسمي --- عنّي بتنوب

[انهل دبس]

السيد ابراهيم ياسين المحترم
لك ما تريد وسنحاول عدم تكرار القافية ولكن سنصل إلى مرحلة لن نستطيع إختراع كلمات جديدة في اللغة وأعتقد أن الأهم من تكرار القافية هو عدم الإقتباس وتحوير الأبيات التي نكتبها . على كل حال لك ماتريد إلى أن نصل إلى الإضطرار
لتكرار القوافي . مع فائق تقديري واحترامي لرأيك .

بْيوصَـلْ عا صِدر مْعَـــرَّا ــــــــــــ بيرجَعْ مَصْلوب

مِن لـَون خـْدود الحَـمْـرا ــــــــــــ غار التـِّفـَّـــــاحْ
شِعَّـلتي بْقـَلبي جَـمْــــــرة ــــــــــــ وبـِتـْقـُولي رْتاحْ
رُوحي ما عاشِـتْ عِـمْــرا ــــــــــــ يَومَـين مْـــــلاحْ
عْطِيني مِن خِصْرك غـَمْرة ــــــــــــ وطـَفـَّيلي الشُّوب