زجل لبنان

محمد حسن شريم · #1 08-06-2005

تكريماً وتقديراً منا لـ شُعراء الزجل الأفاضل نقول :

زجل لـبُنـان

زجـــل لبنان يـــــا روح الذكايا ......... يا عاطي الفلسفي منــك عطايا
أريجك في حقول الفكر عــــابق ......... عـروس الشعر عطّر والصبايا
شحرورك بوادي الفـن ســـــابق ......... غـــزاله شــــارده بقلب الودايا
وعلي حج القماطي ضل عاشق ......... هموم الناس غنّى مـــن الروايا
وزينك بالعنــــــاتــر نسر شابق .......... فوق الغيم حلـــــــق والقــرايا
وسيد مــــــا وقف قــــدام عائق .......... فكرو سهّـــل قــــوافي قـــوايا
وروكز في خيالو كان شـــاهق .......... جبل تانصعدو جينـــــا حفـــايا
وحرب أدوار موتو كان صاعق ......... نعاه الزجل برجالــــو الوفــايا
وجريس ما إلـــو عندك سوابق .......... بريء من الجهــــاله والخطايا
وموسى من ذكاه الشعـر واثـق .......... حفظ في قلعتو لـــوح الوصايا
وطليعك فكر حدو صوت ناطق .......... ربيع زهور أشعـــارو مــرايا
والزغلـــول عالأشعــــار لابق .......... عطى لون الغزل أجمل هدايا
وأسعد كل يـــــــوم جديد خالق .......... فكـــــره شبّعت فكــر الـرعايا
وخليل شحرور شعروشعرصادق ......... نايب عن زجلنا بـــــــالسرايا
وتاعدّد كل شعــــــــار المناطق .......... عنا بالزجــــــل كلــــن غنايا
بناية شعر طابق فـــــوق طابق .......... عالأحســاس مرفوعه الزوايا
حديقه الزجل عنا وصف طابق .......... والشعّــار نحلاتـــــو السخايا
بعد ما امتصت زهور الحـدائق .......... نحله شبّعــــــــت منهــا خليه

................ ونحله شبّعـــت كل الخـــلايا ....................

شفيق · #2 09-06-2005

بلبنان الشعر علا مجالو ,,,,,,,,,,,, وعطا هالكون إبداعو وخيالو

بشعرا ساوت الكلمات مرصد ,,,,,,,,,, لرصد الفكر والشعر وجمالو

وأنا بعتب على محمد الأصمد ,,,,,,,,,,,,,,يللي ما ذكر عمو وخالو

وتواضع بالذكر خيي محمد ,,,,,,,,, ونسي يوضع مع الشعار حالو

,,,

والله إذا بدنا نكتب عن ملايح أخونا محمد لبكرا ما منخلص
,,,

وشكرا يا محمد على هالمشاركة الحلوة ,,,,,

بشار · #3 17-06-2005

منضل مقصرين معك خيي محمد بس بدك تطول بالك علينا .
انا كتبت الردة قبل ما اطّلع على ردة شفيق , هلق طلعت متل ردتك شفيق لأن القلوب عند بعضها ولا لا؟

يا محمد , الكلمي بكل عصورها...........تربّعت عا عرشها بقصورها
ضلت بتولة معطرة بعطورها.............وما كان حجم الكون يرضي غرورها
ولما سطع نور الوحي بشحرورها.........عمّر المنبر تا يزيد سرورها
وبعدو طلع زغلول من دامورها..........نقّز عضام ملوكها بقبورها
وزين اللي حلّق فوق رف نسورها........مدماك مرمر زاد فوق صخورها
وروكز بحكمة وصوت هز شعورها.......وزارها ويا ريت فينا نزورها
والسيّد بنبرة غزيرة نهورها.............بسيفو نحر صعب القوافي وجورها
وحمدان كلمة معطرة وزهورها..........عبّت خوابي الموهبي من خمورها
وموسى بعصاية فكر شق بحورها.........من دون ما يصعد عا قمّة طورها
هالأنبيا اللي وزّعت بخّورها.............مجد الزجل غافي بفيّة نورها
ولما أنا تمعنت في دستورها.............وغذيت نفسي من جنا منثورها
ولما عمشتى الحلو ودّاني الفضول ......اسمك شفت مكتوب بين سطورها

علي عامر · #4 02-06-2007

الشاعر القدير محمّد حسن شريم

روعه نادره هذه القصيده

واسمحلي بكم بيت عن لبنان

اريج الشعر لبنان المبادي * تاج على جبين البدر بادي

بملوك القافيي وأكمل عباره * نسور وبالوقت ذاتو شوادي

الدّني إلها خلق فادي نصارى * وخلق يا ناس للإسلام هادي

لكن أرض لبنان الحضاره * فيها للشعر والعبقريّي

ألف هادي معنّى وألف فادي