May 09, 2008 11:34:19 AM -نسخة للطباعة |(222) مشاهدة
غربة وسفر
غربة و سفر و هموم و عناوين ........ عاكل شهقة آه مكتوبين
باب الفرج مقفول بيهاك الديار ........ وباب الوهم مفتوح برات اليقين
بوهرة فزع و غياب ياما كتار ........ ضاعوا انتهوا متل الشتي بتشرين
باقي الغريب بغربتو مالو اعتبار ........ داير عاحالو بين كومة دايخين
حنّط زمانو خلف أسوار البحار ........ تعرّى الدمع وتكسّر الاسم الحزين
نهارك يا غربة ليل تلجك نار ........ و عاموقد ال ياريت شعلان الأنين
بغفلة مدى بيبقى العمر ختيار ........ و عم توقع الأيام من حضن السنين
خوفي أنا ما يموت بكرا الانتظار ........ و الشوق عم يغلي بطنجرة الحنين
بزحمة شقى شو بيتعب المشوار ........ ب يدق عابواب الرجوع مسكرين
معقول يبقى هيك محبوس الكنار ........ صوتو صدى وديان ما فيها رنين
و صوت الوطن قد المحبه صار ........ عم ينده بصرخة عتب يا غايبين
عودوا على مربى الصبا و الازدهار........ بشريان قلب القلب بقيانين
بواب اليا أهلا مشرّعه و الدار ........ زينه و فرح أنغام و تلاحين
و كل ما رجع غايب عابيتو و زار ........ أرض الحلا رح يضحك الشربين
و تزلغط حجار الوطن و تصير ........ زهور البراري تعانق اليسمين
صوت مغترب
يارب مرّقني على جسر الرجوع ........ قبل العمر ما يغرق بنهر الدموع
يا رب ساعدني على شدّ الرحال ........ تا ارجع و بالخير عا أغلى ربوع
و تا بوّسك يا ضيعتي بوسة حلال ........ و تا شعّل من الشوق عا بوابك شموع
بقيتي معي صورة حلى عا لبال ........ لخبزك أنا قديش عندي جوع
صوتك عشق نغمة فرح موّال ........ و متل الرعد صوت العشق مسموع
مشتاق حوّش تين عبّي سلال ........ و قطّف من عنب أدروخنا المرفوع
وفيّق صباح الخير ب أرض الجمال........ و اشرب القهوي بهيل عالينبوع
راجع أنا يا ضيعتي طال المطال ........ تا شوف قلبي بدارنا المزروع
و شوفك أميره و مارقه بخيال ........ شمس التلاقي و طالعا بطلوع
جايي من الدلبه تا أغزل شال ........ و امسح بلهتة ورد أوجاع الضلوع
