الكاتب: عصام يوسف | من: unknown | في: Saturday, Jan 16, 2010 7:16 PM

ضــيّف الليل بهـــال .. يا مهباج و خلّي القصايد تلبس الدِّيباج ... مِرقوا على نول الحكي .. قبالي خيطان صَوتك و السّــــمع ..نسّـــاج ... غيابك غصون الضو بخيالي و غياب قلبي حول منّو سْياج عملت موج البحر مِعْـقالي و شِدّيت .. بس تكسّروا الأمْواج .. ... لا تزعل ان هب الهوى شمالي و ما كان حاملّك بإيدو سْراج يمكن.. أنا ويّاك خِيّالي .. ... و كيف مِنحارب يا زاهر كيف ؟؟ و نِص القبيله بتقرب "الحَجّاج"!!

الكاتب: رواد أيوب | من: unknown | في: Sunday, Jan 17, 2010 12:59 AM

لك دخيل ربكن

الكاتب: عبدو بيطار | من: unknown | في: Sunday, Jan 17, 2010 1:31 AM

القصيدين تحف ع كبير , يعطيكن العمر الطويل

الكاتب: محـــــــمّد المـــــــــلاّ | من: unknown | في: Sunday, Jan 17, 2010 3:32 AM

قرينا عن المشتى بقصايدكن بالسر قلنا خيّ قلنا إلاه الحي رايدكن تكونو لشمسو ضيّ شفنا المشتى بشعركن جنّي وبتفوق عنها شويّ وصفكن بالشعر جنّني وفيّق ضميري الحيّ *** رحنا وقصدنا دياركن وخير ما عملتو لقينا الحقيقة بمشتاكن عكس ما قلتو *** وين لشجار لْ تكتبو عنا وين لخضار وين لزهور لفوّحت منها عطور وحلا وقمار *** وين النسيم لي يداوي جروح وين السما الزرقة وين هالناي لخلق مبحوح من غصّة لفرقة بتصدقو غير الشقق ما شفت وطرقات ما بتساع ما عرفت كيف سيارتي وقفت وواحد يقلّي رجاع *** وبيوت فوق بيوت حالتن حالي أضيق من التابوت محلا الطبّالي **** ما لقيت هالجنّي لعنها تسولفتو لا تزعلو منّي هيدا لأنا شفتو محمّـــد المـــــلاّ ـ الأمارات

الكاتب: روز فؤاد سركيس(وردة وفا)المشتاوية | من: unknown | في: Sunday, Jan 17, 2010 6:15 AM

يا زاهر بكرا بس يكبرو ولادنا ويعرفو وين ضيعتهم ما رح يضل منها غير المحبة وانتو يا هل الشعار مبدع

الكاتب: اياد خوري | من: unknown | في: Sunday, Jan 17, 2010 9:57 AM

الله يا بو الياس أصيل بعدها ريحة بيوت الشل بكل حرف كتبتو بكل عمل قدمتو متل خوابي النبيذ متل السهر بكانون متلك انت

الكاتب: سناء سعد | من: unknown | في: Sunday, Jan 17, 2010 7:27 PM

يسلم تمك يللي بكل كلمة من كلماتك بتدمع عيونا ع طفولتنا وعمرنا وزكرياتنا المشلوحة باحلى ضيعة بالدنيا

الكاتب: عابرة | من: unknown | في: Sunday, Jan 17, 2010 8:18 PM

طولت الغيبة بس هالرجعة حلوة كتير,

الكاتب: محمود الياس حنا دبي | من: unknown | في: Sunday, Jan 17, 2010 10:05 PM

محمد الحل ضيف ....بأهلا وسهلا وصحاب الوفا أستقبلوا بالأهلا... زيارة المشتى ما بتصير بالليل بنهارها بتشوف وفا أهلا شجرها الكان غافي ومسرور بتاني فجر ما شافك بحفلا بالليل يا محمد البدر بدور وعا كل شقة من شققها يزور ولما دق عا باب زايرنا ما شاف إلا العطر والمنتور بعز الشتي قررت أنت تزورها ما لقيت غير حجارها وصخورها تاني عزيمة انشاء الله بعز الصيف تتشوف كل سحرها وقصورها .

الكاتب: عامر أسعد | من: unknown | في: Monday, Jan 18, 2010 1:40 AM

يسلم هالتم يا زاهر وعصام ويلي بتحنولو بالغربة نحنا بنحنلو هون لانو ما ضل شي من الاماكن يلي ربينا فيا الا صار كتل باطون وما شالله محمد الملا صار بيحكي مشتاوي قح

الكاتب: متغرب ومشتاق | من: unknown | في: Monday, Jan 18, 2010 3:33 AM

تغربناو قلنا ما رح نحن ماتاري قلبنا بالهمس بيجن وودعنا الاهل واخدنا من الحبق شمي قلنا رايحين لدبي وبكرى منشوف الجني وشفنا وعشنا وبعدنا من صورة وردةاو حبقا منجن و الاهل بيراسلونا ومن دون قصدن جروحنا بيفتحو و السهرة بتخبي دموعنا والقلب بيعن ع بالو لو يرجع وبدل الدمع يحط كاس بالسهرة ويغني عتابا و ميجنا و تمرق حلوي عم تنده انا رايحة تدريجي يا مين معي يجي

الكاتب: Eiad | من: unknown | في: Monday, Jan 18, 2010 4:31 PM

تمثال ملح ** حنينك شرْق بالقوّه تقسّم نغم أطرش على عودك تقسّم وصفن فيك العزف تمثال فضّه شرب صوتك .. وعاقدّك تجسّم ولمّا الملح من دمعك تفضّى شعر من بحرك المجروح نسّم شفت منّو خليج الآخ عضّه بشطّك حرفها مكوي .. مكسّم وشفت خْيالك برملو توضّى وصلّى الشوق عيد وماترسّم كأنّو الليل وجه العمر قضّى يتبسّم برِد - من تحت لتمه - ببيلسع .. كل ما تمّو تبسّم ----------------------------------- خيّك إياد قحوش

الكاتب: زاهر حدّو | من: unknown | في: Tuesday, Jan 19, 2010 12:49 AM

يا عصام بْدُنية شرودك و الليل دفقة موهبي شفتك عم تعربش على جرودك تْنَزِّلْ الشمس بإيدك تقِلَّا غْرِبي تْلِم القمر يلي وِقِع بالساقية و تـعـلِّـقو ع الليل توعي النجمة المن مبارح باقية تقِلَّا هْرَبي ضو الشمس جايي متل شي سيل ****** تْغَطـِّي الجبال الباردة بشرشف ضباب و تعمِّر بطقس الشتي قناطر صحو... بقوس القدح تقلِّب ع موج البحر صفحات الكتاب و تسكب الغيمة بقدح ****** و شفتك عم تبدِّل بهالإيام تلغي من التاريخ فترة بتكرها و تأنسِن الحكام و تبعت قوافل من البصرة ع الرها ****** هيك شفتك عم تعَمِّر مملكي ع بوابها سيوف الحكي حجارها من مقلع الأحلام و بوابها من غابة الإلهام و طلَّيت ع دراج الوحي سألتك دخلك شو بيهمَّك من الحجاج مازال مش ع الأرض مملكتك زاهر - دبي

الكاتب: زاهر حدّو | من: unknown | في: Tuesday, Jan 19, 2010 12:51 AM

لرواد: كلماتك الفيها عشب أخضر بقلوبنا بتْغِّل فيها عشب أخضر فيها نوايا متل لون الفِلْ و بعرف أنا.... بيحكي القلب أكتر كِلما الحروف تقِل

الكاتب: زاهر حدّو | من: unknown | في: Tuesday, Jan 19, 2010 1:01 AM

للدكتورعبدو بيطار: يا عبدو بنكتُب تا تهِل و بالأشعار تواكبنا و لو نعرف مش رح بتْطِل يمكن ما كنِّا كتبنا

الكاتب: زاهر حدّو | من: unknown | في: Tuesday, Jan 19, 2010 1:14 AM

للشاعر محمد الملّا: يا ضيعتي الفيكي القمر صَلّا لا تعتبي ع محمد الملّا انما قدر فيكي يشوف غير حجار ...... كل خمرة و في لها خَمَّار ضيوفك يا مشتى لا تلوميهون اللي بيسكنو فيكي متل زوار غير اللي إنتِ ساكنة فيهون. ******* و لمَّا الملّا قريت صفحاتو ما لقيت صحرا بقلب كلماتو وما شفت بحروفو بدو ولا خيام و لا قافلة ضاعت ع درب الشام... شايف كأنو خيال بسطاطي بين الحقيقة و الوهم لاطي ريحة كذب أبيض بسهراتو شايف شباب مجمعين بليل و حسان عم يسرد حكاياتو

الكاتب: bassam Georges | من: unknown | في: Tuesday, Jan 19, 2010 5:33 PM

الأخ و الصديق العزيز زاهر كلماتك دائما معبرة عما يجول في خواطرنا و أفئدتنا .. شكرا لك على هذه العواطف الصادقة ، المعبرة و الأكثر من رائعة الله يخليلك ولادك و أولاد الجميع و يحميون و يبعتلون أيام أحسن بسام جرجس / الرياض

الكاتب: عاطف جرجس | من: unknown | في: Tuesday, Jan 19, 2010 6:25 PM

حبيبنا زاهر الموضوع حلو ..... والتعليقات احلا واحلا الله يقوّيك .... وخلّيك عم تكتب قد مافيك وبالغربة كلنا بالهوا سوا وقد ماتغربنا وبعدنا .... بالآ خر في النا رجعة ع المشتى عاطف جرجس - دبي

الكاتب: زاهر حدّو | من: unknown | في: Wednesday, Jan 20, 2010 2:20 AM

لوردة وفا: كلماتك الفيها وفا بترد للشعر الدفا كلما القصيدة تنِّدق من البرد بين الحروف بتخلقي و ع الشعر لمَّا بتمرقي بتفوح ريحة ورد ***************** لإياد خوري: في ناس خِـلقِت للطلب و العرض بتساوم..و بتساير البيعة و في ناس ...متلك.. لو تدور الأرض بتضَّل فيها طيبة الضيعة **************** لسناء: بكلماتِك صار الإحساس الذكرى المجروحا يداوي المشتى وَدِّيـتِـك تا الناس يشوفو الورد المشتاوي *************** لعابرة: يا عابرة ... و الشعر هبة طيب عبورك بيفتِّح ذوق و محبِّة لو غِبِت ما بطوِّل .. و لمَّا بغيب بتبقى المشتى و أهلها بقلبي **************** لمحمود: هالمُّلا مزحة يا شريك إنعملِت حتّى نتسلَّى مشتاق بسهرة لاقيك تا نشرب كاس المُّلا *************** لمغترب مشتاق: يللي شوقك مالو حدود شفت اللهفة غامِرتَك إنشالله ع الضيعة بتعود تلاقي الحلوة ناطرتَك ***************

الكاتب: زاهر حدّو | من: unknown | في: Wednesday, Jan 20, 2010 2:21 AM

لعامر: يا عامر الإنتو عليه بتزعلو نحنا بنزعلو اكتر و اكتر كلما تغيَّر شبر من مشتى الحلو بنْحِـسْ لون الذاكرة تغيَّر و كلما الغصون الخضر فيها بيدبلو بِنْحِـس صارت هالدني اصغر ****** مع هيك.... بعدا حلوة الحلوين اللي جبينها بلون القمر مضوي متل الحبيبة اللي بصبا العشرين ع خصرها رقص الحلا بيغوي لو تشْرَنِت نتفة و مروا سنسين بتتغَّير.....و بِتَّضلها حلوي

الكاتب: زاهر حدّو | من: unknown | في: Wednesday, Jan 20, 2010 2:23 AM

للدكتور إياد قحوش: إيَّاد و حدك للشعر عِـزوي حامل بإيدك من الدلبي شِلْحْ لمَّا بتعمل ع السما غزوة بتجبر إلاه الحرب يطلب صِلحْ و شِعرَك العندو للفَرَح نزوة بيرسم البسمة ع الوجوه الكِلْحْ لولاك كان الزنبق بيزوي و كان النحل بيجوع لوما يكون بيقطر شهد .."تمثالك المن ملح"

الكاتب: زاهر حدّو | من: unknown | في: Friday, Jan 22, 2010 11:09 AM

لبسام جرجس: من كلماتك يا بسَّام عطر الإلفة نَسَّمْلَك إنشالله بتضل الإيام حلوي ..وعم تتبَسَّملك **************** للخال عاطف جرجس: يا خال قبالك مخجول كلماتك دفقة وجدان إنشالله مهما الغيبة تطول بنرجع ع ارض التحنان متل الطير اللي بأيلول بيرحل...تا يعود بتيسان

الكاتب: محمود حنا | من: unknown | في: Saturday, Jan 23, 2010 8:09 AM

الى الشاعر الكبير أبو الياس يا زاهر غمرتنا بأشعارك قريب اليوم رح أقصد دارك خوابي خمر ما بتكفينا ... لنقدر نفَسر كل أشعارك .

الكاتب: غيث بارودي | من: unknown | في: Sunday, Feb 7, 2010 8:53 PM

و الله يا أبو الياس يسلم تمك على هالقصيدة الغير شكل و ما شالله الشباب كمان ما قصروا... الله يخليلنا هالمواهب يا شباب....و الله شي بيفرفح القلب الحقيقة..

الكاتب: سوسن تقلا | من: unknown | في: Monday, Mar 1, 2010 1:40 PM

بتجنن عن جد دمعت عيوني

الكاتب: زاهر و رفيف | من: unknown | في: Thursday, Mar 4, 2010 6:35 AM

للصديق غيث بارودي: الكلمي الحلوة الشفَّافي بتوعِّي الـورد الـغـافــي و ما بيقدر يفرح بالشعر إلا اللي قلبـــو صافــي

الكاتب: زاهر حدّو | من: unknown | في: Thursday, Mar 4, 2010 6:39 AM

لسوسن: نيسان لمَّا سِحرِك استوحى صِـرتي قصيدة ورد يا سوسن و دمعة عيونك للشـــعر لوحا متل الندي ع وردة السوسن

الكاتب: سوسن تقلا | من: unknown | في: Saturday, Mar 13, 2010 11:22 PM

شكرا كتير زاهر ..بدي قول المشتى طول عمرا دايرة بالا علينا ،السؤال يا ترى نحنا عم ندير بالنا عليا؟ وياترى رح يضللن لولادنا شي صورة من الأماكن الحلوة الي لعبنا فيا..تحت الدلبة..عند النهر جنب الكنيسة..البيادر ....؟مابعتقد ! صدقني عم احكي هيك بغصة و حسيت المشتى عم تتطلع بقهر وتقول ديروا بالكن علي شوي.. بس شوي حتى اقدر دير بالي كتير عاولادكن.