|
 |
وأنتو أيمــت جاييــن ع المشتى ؟؟؟ بقلم رامي خوري- موقع مشتاوي
المعروف عنا نحنا السورين أنو وقت بنحكي مكالمة دولية منعّلي صوتنا , وكل ما بعّدت الدولة بنقوي صوتنا أكتر , يعني كل الحارة بتسمع شو حكينا , كيف إذا كنت نايم حد التلفون وأمك عم تحكي ع أميركا من الصبح يا فتاح يا رزاق .
كيفك ( هيله )* ؟ كيفـــــن ولادك وجوزك ؟؟؟
نعــــــــم !!
قديش الســاعة عندكن ؟؟
الحمد الله كلنا منـــاح . مشتاقيلكن كتير .
ايمــتَ جاييــن ؟
آه ه ه ه ه ... ما فهمت ... بعشرين حزيرون !!
سلامتك .. ما بدنا شي .
الله معك .. ناطرينكن ها .. سلّمي كتير .
وأنّو تخلص المكالمة قبل ما تروح الناعوسة .. مستحيل . تاري بأميركا عاملين بطاقات بتحكي مرة واحدة , يعني ما بيخلصوا حكي تا تخلص البطاقة. ولحق ع َ لَت حكي , شي بطعمة وشي بلا طعمة , وطول بالك إذا فيك !!
هيك كان صباحي اليوم , وأكيد جزء من حياة أهالي المشتى . هل بلدة الصغيرة , اللي نادر تلاقي فيها بيت ما بيحوي مغترب أو اكتر منتشرين بمعظم بلدان العالم , وحتماً أنن صاروا أكتر من المقيمين بكتير . معظمن بيغيبوا سنة كاملة وبيطلّوا شهر بالصيف .
طبعاً الصيف بالمشتى وَفي وصادق وما بينسى محبينو بينطرن كل سنة , والسنة كالعادة بلّش يلبس أحلى تيابو , مع أنّو مبكر شوي , بيجوز خايف يكون عمرو قصير لأن رمضان السنة بعشرين آب واحتمال ما في مهرجان ! ( عَ ذمة مجلس البلدة )
الاستراحات ع الطرقات وع الجبل فرشت طاولاتها وكراسيها الجداد , قناني البيرة عبّت البرادات , وفحم الأراكيل ملاّ المناقل ناطر الشعلة . وصوت جورج وسوف كيف ما درت أدنك .
سهرات الليل جاهزة , مو ناطرة غير الضحك ودقات الكاس ... ( وخلّي الجَّد ع جنب ... وتعا بورد تعا بورد تع ...... واسمع بس اسمع ... يلّي مجنني )
الأنبـوب صـقّع ميتــو .. والدلبـي فرشـت فيّتــا .
إعلانات البرامج الفنية للمطاعم وصور المطربين عم بتعربش ع الحيطان وأسطح البنايات , تا يخبرونا بمواعيد حفلاتن , ويدعونا نشوف حلتن الجديدة .
المسابح تعبت مَي وركّبت الشماسي , وانفتح باب الاشتراكات ودورات لتعليم السباحة .
أخبار ومواعيد الأعراس بلّشت تكتر ... وهيسوس ضحكتو شبر .
وع سيرة الأعراس ما فينا وما نتذكر شباب المشتى المغتربين , اللي بيجو شهر بالصيف يا أما للترفيه وشوفة الأهل والاحباب , أو لإتمام زواج مؤجل من شهور وأحياناً سنين , أو للبحث عن عروس وحب صادق .
طبعاً شباب الفئة الأخيرة من وَصلت الواحد منن بيتوكل أو بيوكل أمو بمهمة البحث عن بنت ( أدمية ومتعلمة وست بيت ... ) , ( وبنت الحلال بتشبع بلقمه ) . والدني صيف , والحلوين داير من دار , والعين مفتحة 12 عَ 10.
وما بيلحق المشحر يبلّش أجازوا حتى يحسها خلصت , ( ويا بتظبط يا ما بتظبط , يا ما بتظبت بالمرّة .. ملّيت يا ماما ملّيت ) وإذا ظبطت وعلقت السنارة بتكون ع الأغلب بآخر أسبوع من الإجازة , ولحق إذا فيك تلحق !!
وهيك بتنتهي الإجازة السنوية وبيرحل الصيف وعريس الصيف شي مكسور الخاطر , شي الفرحة مو سايعتو , تا يكمّل مشوار كفاحو مع شريكو الوفي يا أما صحراء الغربة يا أما عروس حنونة !!
وأنتـــــو أيمـــتَ جاييـــن ع المشتــى ؟؟؟ ناطرينكــن هـا .
رامي خوري – مشتى الحلو
22/5/2009
*: هيله : جارتنا زوجة مروان العطية – هاجرت مع عيلتا ع أميركا من شي 5 سنين .
التعليقات المطروحة لا تعبر عن رأي إدارة الموقع و إنما تعبر عن رأي كاتبيها
تعليقات
|
|
