الكاتب: القصيدة رقم / 1 / | في: December 03, 2008 07:06:27 PM

لمـا رفعتــي لفـــوق ايديكــــي ........... كمشتي الحلا وكل الحلا تحصّل وقت اللي قرب وانجـــذب هيكي ........... ومنــك مــا عــادي فيــه يتنصّل حتى تحت عرشك سجد ليكي ........... وخلى الشمس بالكــون تتأصل نـــور السمــا لجمّــــع بعينيكـي ........... بعـد لي شافــــو ع الأرض وصّل قاســو ع قـــدك فصّلو عليكــي ........... حتـــى طلـــع ع قــــدك مفصّـل ****** كرستينا .. من الغيب شو هـ اللوّن ........... مبين غريب بشكل مستوحى من لون الله اللـــي رسـم هـ الكوّن ........... لزهّر جمــالو وزيــن اللوحــــة بزهرة عطرها فـــاح هون وهــــــون ........... كبّــر الأرض وزغــــرت الفوحة ****** وعمر السبعتعشر سنة هـ الكاس ........... بيـن الكواكـب كاسر العزلة بلّــور ضـاوي مجوهـــــر الإلمـــاس ........... بيـغزل غيـــوم وتلمع الغزلة بالمــجد طالــــع ما ألــــو مقيـاس ........... وعمر المجد ما بيعرف النزلة ******* ورقصـــة فراشـــة حــول القناديل ........... لشعلت من الغيــرة بقلب القصر يوقـــــــع الليـــل وينتحـر قنديـــل ........... ع كـــل هــزة زلزلـــــت ع الخصر ونيليــن ينفجــــــرو بــدال النيــل ........... وفرعــون مـن قبرو يقــوم بمصـــر يشلــح العتـــم بشلحة المنديل ........... ويلبس صباح الخير قوس النصر ****** ولعبـــة الجبل عندك بيصفــي سهل ........... وتحتــــك عجينة هـ الأرض تفرح بالعلم تمشـي وتدعسي ع الجهــل ........... وع كل دعسة تهندسي مسـرح ****** مشتــى الحلــو بألفيـن وتمانـــي ........... لبستــي عَ أيـدا تاج مشا الله وصرتي تشعشعي بشكل نوراني ........... ودلب الدهب ع تاجــك تجلّى وشلـــح الأرز المقــــدس وحانـي ........... بــوّس جبيـــن لبسمــــا علّى ومـــدام صرتــي كتيــــر حليانــي ........... والشعر منـك بالحلــــى تملّى الله كتبلـــــــك شعـــــر ربانـــــي ........... عليكــي حكـــم وبكلمتو غلّى ولجنـــة حكـــم هـ الشعـر لبناني ........... بتحكم عليكــي من بعـــد الله

الكاتب: القصيدة رقم / 3 / | في: December 08, 2008 11:56:27 AM

بعيونك الحورا صرت اكتـب غزل ........ بشَعرك حريـر الهند مغزالي غزل لو رِدِت بيعن في دكاكيني غزل ........ جو يشترها الناس من كل الدنا ****** بقي مشوار حتى الرب رسْمك ........ تا عشقوا كل أهل الأرض رسمك إجو للرب سالــوا اشقّـد رسمك ........ أجــابن سعرها بوزنـــا دهــــب القصيدة : شـو ضّرك يا كريستينا ........ لو تجّرأتي وبستينا ولا تركتي هاك التينات ........ تهرهر ويشّلف تينا ***** يا ريت بقينا عجيان ........ وحظينا بهاك العينان لا تلحّمنـا تنان تنان ........ ولا قدرتي قشّطينـا ***** يا حلـوي يا لــون العــــاج ........ كهربتينـا فـواج فواج حاجي تقسي علينا حاج ........ شو عملنا تا قتلتينا ***** شعرك ع كتافك مسـدول ........ جفني من زنبق معسول اللي بيشرب عمرو بيطول ........ غيـر اللـي بيشرب كينـا ***** عينـي ها لطول وها لقدّ ........ وبحـر عيونـك هالممتـدّ ومهمــا علينــا قلبك شدّ ........ منرضــى لــو موّتينــــا ***** كسنك إشعاع وألحــــان ........ وشفافك قدس القربان وشي شفناكي بالألوان ........ كفرنــا والله ينجينـــا ***** الملكي كريسينا سعادي ........ مــن حوريّات بلادي كسرتــي ضهــر الصيادي ........ ولعنتي بيّ الشبّان ولا تركتي درهم فينـا

الكاتب: القصيدة رقم / 4 / | في: December 12, 2008 05:27:45 AM

---------------------------------------- شِعر الغـزل تايغـزل المطلع ..... صوبك مرق من لحظِةْ الشافك عاتلجِةْ خدودك هدي وصقّع ..... وحروف داب بجمرةْ شــفافك يرسم قصيدة من حروف النور ..... تشبه طبيعةْ ( قد ) سحرية ومين ال بيقدر بالغزل ع سطور ..... يصوّر سحر جنة طبيعية ؟ ودمـــوع مريم عاصـــليب الـــرب ..... انمزْجو ع لونو ..بحرقةْ الأنّةِ بني احترق .. ت الرب لونن حَب ..... وصب بْعيونك لونها البني والتاج يلي كـــان قدّامك ..... ألماس لابس ... بارق ووهّاج وقت لِ لبستيه عاهامك ..... صرتي جسم ألماس حامل تاج وصرتي بهــــالةْ ورد مغمورة ..... وهالة عطر .. وتْنَينهن لالو يلي بيقشعهن على الصورة ..... بيشــعر بإنهن فوّحو قبالو وقالو: بحلاها مكمّلة وكتير ..... الله بجمال الروح جمّلها ماتتوجت مَلْكة بعمر زغير ..... لوما بعقل كبير كمّلها.. ----------------------------------------------------------------------

الكاتب: القصيدة رقم / 2 / | في: December 13, 2008 07:14:41 PM

أحلى نجم طلعتي ع سلّم ورد صحّيتي الحلم ............. توعّى المدى تا صار في عندو علم إنتــي ال بحبــل النـــور الله أنزلا ............ بصف الخليقــه تاخــدي أول رقـــم و إنّو الصبح برموش عينيـــك اختـــلا ............ و قوس القزح مهموك يعملّك ختــم تا يختم التاج الحلـو بكـــف الفــلا ............ و يرصّعــو بنجـــوم و يــدوب العتــم و بيــن الكواكــب طلّ نجمك ع الملا ............ تزيّن جمال المملكــه بأحلى نجم وكنتي بدار المحكمـه القاضي اعتلا ............ منبر حقيقة هالسحر طــار الوهم و لمّا نطق ب اسمــك تحــوّل صــلا ............ بهيكل رحيـق الورد واربحتـي الحكم و عا كتر اسمـــك ما أخد منّك حـــلا ............ تحلّـــوا حروف الأبجديّه بهالاســم

الكاتب: القصيدة رقم / 5 / | في: December 18, 2008 03:19:27 PM

رب الجمال بسحرك تغنّى ولمّا الورد...!!فتّح عا خديّيكي خاف الدهب...? ما يلبق عليكي وسّع التاج...!!! وقال لبّيكي المشتى صرخ....?? متّتوجي عنّا ........ يا لابسي تاج الجمال...!! قبال لجنة حكم...!! عم تجمع الفرحة وحلمك بسهرة تلبسي الطرحة عا حصان ابيض ناطرة ...!!!خيّال .... بين الحلا...!! عرفنا الحلا بيربح وتوب البراءة مفصّل عليكي وجّك ملاك...؟ سيوفك بتدبح وأجمل ما فيكي لون عينيكي ........ غطّي الحلا بالروح .!!!وابتسمي وهدّي جبال الكبريا..؟ بنسمة وفوتي عا مملكة الحلا بتقدير وقولي ب دهب...!!رح ينكتب أسمي .... ملكة جمال ...!!!بضيعة الحلوين أكبر تحدّي تلبسي تاجك ولوما يكون الذوق...? محتاجك ما كان ليكي صوّتوا تخمين ولا كان شطّك بوّس مواجك بضحكة بريئة...!!! بين المحبّين من شفاف غطّت بالحلا عاجك

الكاتب: القصيدة رقم / 6 / | في: December 20, 2008 10:50:53 AM

هيِّ المشتى مغيّرة عليِّ .......... ولاّ وهم بتشوف عينيِّ كانت سعيدة بالسما عشتار........ وبإيدها تاج الحلا هديّة شافت المشتى وكر للتجّار....... وبيوت فوق بيوت مبنيّة فيها الحلا بمكتب السمسار....... بينباع للنخاس يوميّة نزلت حزينة ع.الأرض عشتار ..... وتاج الحلا بأيدها هديّة ..................................... كانوا الصبايا ناطرين الغار...... إكليل من عشتار عيدية يتوّج جمال الصيف والأشعار.... وصيف الجمال يتوجا هيِّ كانت كريستينا بهالمشوار........ شمس وقمر ونجوم مضويّّة بنت الطبيعة جبينها نوّار ..........ومن جنة الإلهام حوريّة لعيونها رح تنكتب أسفار ......... وسفر الجمال عيون سحريّة ولغيرها ما اتبسمت هالدار..........وتاج الحلا ع. قياسها هيِّ وتاج الحلا ما بينهدى تذكار........ ما دام فينا هالعبوديّة من هيك رجعت للسما عشتار...... كريستين معها بتاج حريّة .............................................................................

الكاتب: القصيدة رقم / 7 / | في: December 20, 2008 12:26:59 PM

كلمة غزل لمّا جمالـك للحلى كلّـــو اختـــزل ........... التّاج انغسل بالنـــور و النــــور انغســـل بروح العبيـر الفــاح من وردو لكــي ........... طلّ الوحي و أجمل شعر فيكــي ارتجل خيالك مرق ع النوم صرتي تفركي ........... جفون النعس فاق السهـــر كلّــو اكتمل و صــار الحلى بعيونك يترجم حكي ...........و أيلـــول فيكــي طــــار عقلو و انشغـل مرقت على الشبّاك دعسة ليلكي ........... توشوش رمش مكحول بالسحر انجبـل و قالـــت دخيلك جيت خبّيني بكي ........... ليكـــي القمـــر منحيرتــو دايب خجـل عنـد المسا ع سهيل شفتو بيرتكي ........... بيمدّ حالو فوق مـــن بـــرج الحمــــل بيتنقـــوز عليكـــي عيونــــو ملبّكي ........... ومـــن غيرتـــو غيّــــر مــدارو و انعـــزل قعدتي محلّو ع العرش عم تضحكي ...........المرّيخ حاكى المشتري و خبّــر زحــل قلّو مـــلاك جديــــد جايي يا ذكـــي ........... ولمّوا الكواكب بعضــن بــراس الجبــل و نزلوا على الكفــرون وصلوا دَرْبَكي ........... تــــا يسرقـوا بالسرّ منّك عـــا عجــــل لمعة دهب مشغـــول فيه بتسبكي ...........جوهـــر حلاكـــي بلـــون كرمالــو انغزل تاج الجمال و دمّعــت عينــو و بكـي ........... إبــن الزمـــن دمعــة فـرح فيكي احتفل براس السّني من العيد جيتي تحبكي ...........خيمـــة فـــرح و يجـنّ بفنونو الزجـــل و مشتى الحلو بمصرف جمالا بتملكي ...........أكبـــر رصيــد من الحلى و زهو الأمل وشّ الصبح و الــــورد عــــا إمّو تكــي ........... شفت النحــل بيحــوم عــا كلمـة غزل من حروفها شكّـــل خلايـــا و مملكي ........... ع شفافك و ملهوف تا يجني العسـل

الكاتب: القصيدة رقـم / 8 / | في: December 23, 2008 11:39:48 AM

ملكة جمال المشتى عا ملعب الأحلام رحتي تسرجي .................. مهرة حلى ب ساحة المشتى و تجي من الكفرون جيتي ترافقي عين الشفق .................. حملتي فرح هالكون زيني و بهرجي التفّوا الصبايا حولك و فيكي انعجق .................. بيت السهر بقمار كنتي مسيّجي من مرصدو أيلول شافك و اشتلق ..................إنك على نيسان وردي مغنّجي غيّر طريقو صوب عينيكي و فرق .................. نجمة صبح صرتي معو تتدرّجي و صار بحلاكي يكحّل رموش الحبق ..................و إنتي ببوح الفلّ عم تتبرّجي قال الحلى خصوصي إلك فيكي انخلق .................. بنغمة صبا عم تصدحي و تتصولجي بغفلة ربيعو الورد ع تيابك مرق..................و كنتي ع بال الزنبق بتتمهبجي متل الحرامي ريحتو منّك سرق..................و سرّ التمادي بالنقاوي المبهجي و أعلن رحيقو عنّك بلهجة عبق..................إنك ب ذاكرة الحلى بتتهودجي بيلبقلك تكوني الوحيدي بهالسبق .................. ملكة جمال و عن جدارة متوّجي بعيد الصليب من الغرب اسمك شرق ................... ضوّى الأسامي و صار يلمع رهوجي و لمّا الجمال انقاس و عليكي انطبق..................و جيتي ب تاج المملكي تتوّجي فتّح زهر أيلول و اخضرّ الورق .................. و مشتى الحلو لبست قميصا العوسجي من بيت جيرانو القمر راح انطلق .................. وقّف ع برج الحلم وقفه محرجي قام و شلح حالو ع خدّك و احترق .................. و صرتي حلى بالنور عم تتوهجي

الكاتب: القصيدة رقم / 9 / | في: December 28, 2008 01:28:17 AM

دخيلك يا ملكة الكون حيدي و يا (كريستينا) ضحكتك زيدي بِِصير بضحكتك أوسع مجالي وبوصل ع دني عنا بعيدة في قّّّصة عن المشتى ببالي قديمة بسرها و منها جديدة وحتى ما يضل السر غالي مني اسمعي القصة بتغريدة الله ال مركزوا بالكون عالي قبل ما قال كوني يا عبيدي خلق شمس وعطاها النور هالة و قمر و نجوم و الليل النبيدي وقصيدة صار يكتب بالليالي القصيدة طلعت المشتى الفريدة فيها صورمحفورة بخيالي بعد ما قريتها برحلة سعيدة مغارة طيور و كروم و دوالي وعجقة ناس فرحاني و أنتي الصور ة الأجمل بكل القصيدة *********************************************** عيوني قزازها صافي النوايا ولأنك بالشعر صرتي ملاكي تمري بظل عينيي الوفايا وبلا ما توقفي قبال المرايا المرايا ما بتستوعب حلاكي *********************************************** ومهما تروحي شرق يما غرب قبال البحر لا توقفي بتموز بيركض وراكي بكل حي و درب ت تغرقي و منك يشيل كنوز *********************************************** قلبي كتبلك أجمل قوافيه حيثو بدفتر للعشق مخروز من بعد سكبة شعر ما بتنسيه تذكرت سحرك وين حاسس فيه حسيت فيه بحنجرة فيروز *********************************************** قلبي خفق ليكي و عيوني تنبهو وقت ال علينا نورك الغالي انتشر لا تفكري فيكي القمر رح شبهو أجمل قمر ت شبهو فيكي فشر ولا تفكري عليكي انا عم بفتري ما القمر نحنا منعرفو صخر وحجر و انتي حلاكي سحر فكرة عبقري انسكبت معو من بعد شي ساعة ضجر ***********************************************

الكاتب: القصيـدة رقم / 10 / | في: December 29, 2008 06:38:46 PM

كَيِّـف ياصَيف وسُـوحْ في مشتى الحـلو *** تا تْشـوف عِـرس الفـَرَحْ بادِي بْأوَّلــــو سَهْرة ْحَـلا ... عْـلـَيها الحَـواري مَـيَّـلـُو *** وتأنَّـقــو ... وتْـلَـبَّسـو ... وتْجَـمَّـلــــــو وياما بْـلَيالينـا ... البَـلابـِـلْ مَـوَّلــــــــــو *** بْألحان ... خَـلِّـتْ هالكَـواكِـبْ ينْـزَلــــــو وعا مَهْـرَجـان الصَّـيف ... لَمَّا حَـوَّلـــو *** عِـرفـُو بإنّـو الحَـلا ... عِـنـّا مَـنْهَـلــــــو اتـَّفقـو سَـوا مَع بَعِـضْهُـنْ .. تا يجَـمِّـلـو *** ويألِمْـسُـو ... ويزَينُـو ... تاج الحَــــــلا لْ مَـلْكِة ْجَمال الصَّيف في مشتى الحـلو ***** إنتي يا مَـلْكِه .. والحَـلا لِحْـمِه وسِـدِي1 *** عَـنْ بَعِـضْـكُـنْ لَحْـظه ما فِيكي تِبْعِــــدي بْضَـو الشَّمِس ... جُـوَّاتْ قـَلبـو تْمَــدَّدي *** تا ما الشَّمِس عا تـَلِـجْ صِـدرك تِعْـتِــدي بْضَـو القـَمَـر ... بيجـِنْ لَمّـا بْتِشْـــــردي *** وبيخـاف ... عا ضَـو القـَمَـر تِتـْعَـــوَّدي كَـونُـو النِّــدي .. بيتْساقـَط بْضَـو القـَمَـر *** خاف النِّـدي ... يجْـرَحْـلِكْ الخـَـدْ النَّـدي ***** يا مْعَـمَّـدي .. بالنـّور والسِّحـر الحَــلال *** لا تْـبَيني قـْبال القـَمَـر .. مِـنْ دون شال بْجـِبْـلِك الشَّال ... مْحَـيَّـك بْنَـول الخـَيال *** يغـَطـِّي جْعـود ... الليـل منها لَـون شال لا تِمْـرقِـي عا الـرَّوض بـِغـْـنــاج ودَلال *** فِيكي يا مَـلْكِـه جَـنْ مِـنْ قـَهْـرُو الــدَّلال حتّى الجَـمَال احْـتـال يسْـرُقْ وَردتَيــــن *** مِن رَوضْ خَـدِّك ... تا يْسَـمُّوه الجَـمال ***** ألله ... وَقِــتْ ما كَـوَّنِــك بالـــــــــــــذات *** ما قِــدِرْ لَمْسِـه ... عا حَـلاكي يزيـــــــد لِجْـبيـنْ تَـلـج ... عِـيون عَـسْـليّـــــــــات *** بْغـَمْـزة ْطـَرَفـْهُـنْ ... بـِلَّشِــتْ تِنـْهيــــد والشَّـعِـرْ ... سـارقْ لَـونْ مِـنْ عَـتْمــات *** لَيـل الشِّـتي ... ومْـزَيَّـنْ بْتِجْـعـيــــــــــد وفـَوق العـيـون ... سْـيـوف شامِيّـــــات *** ورْمُوش ... تِـرْمِي سْـهامْها من بْعـيـد وعا الخَــدْ ... مِـنْ جُـوري حَـما وردات *** والجـِسِـمْ ... غِصـن البان لَـو بـِيميــــد والأنِـفْ , قِـمْـقـُمْ ... والصَّـدِرْ , جَـنَّـات *** والرِّيـقْ ... مِـنْ أطـْيَـبْ وأشْـهى نْبيـــد وشْـفاف .. صِـيني2 .. حِـمِـر كَـرْزيّـات *** خَـلُّو الجَـمِـرْ ... جُـوَّا ضْـلوعي وقِـيـــد وألله ... بَعَــتْ مِـن مَتْحَـفـُو ... نِحّـــات *** ينْحَـتْ إلِـكْ ... أرْهَــف وأحْـلى جـِيـــــد وصابيـعْ بـِبّـو ... مْـنَمِـنْمِـه السَّـكْـبـات *** وزْنود ... مِـ كْـريستال ... مِـشْ تِقـْليــد وجـِبْريل نَفـْسـو ... جَمَّـعْ النِّجْـمـــــات *** وحَـطـُّـنْ عا تاجـِكْ ... تا حَـلاه يزيــــــد كريستين ... إنتي أجْمَـلْ المَـلْـكـــــــات *** وألله ... بَعِــدْ ما نَحَــتْ فِيكـي سْـنيـــــن مِتْـلِك يا مَـلْكِـه ... رَفـَضْ إنّـو يعِـيــــد ***** تــاج .. مْـرَصَّـعْ بالإلمــاس *** الواقِـعْ .. مانُـو من مْقامِـكْ تاجـِكْ فـَرْحَـه بْعَـين النّـاس *** وخِـيطان الشَّمس حْـرامِــكْ ***** 1ـ لِحمِه وسِـدِي: الخيوط الأساسيّة لنول الحياكة , وهي أقرب ما يمكن لبعضها . 2ـ صيني: تشبيه يُطلق على الشِّـفاف الرقيقة فيقال: شِفـِّة أرَقْ من فنجان الصيني .

الكاتب: القصيـدة رقم / 11 / | في: December 29, 2008 06:40:39 PM

بْصَيفِـكْ يا مشتى ... فتَّحِتْ فيه الورود لـَمَّا الجَـمال ..... تـْرَبَّـعْ بوديانهـــــــــا لِبْسِتْ وشاح الأخضَر حْـفافي الجــرود ومن كِتـْرةْ زرارو ... انـْحَـنِت عيدانهـا حَبل الشَّمس ل ِ انـْمَدْ فـَوقـا عا لِبْـرود خَـلـَّى النـِّدي ... غِـرقان في أحضانهـا وريح الصِّبا يداعِـبلْها كْراسي الخـدود بَـدْل ِ الورود ... الزاهـْيي ألوانهــــــــا شو بيمنـَعو لـَو راد يدخُـل عا الحـدود ويركَع بِ دار السَّـلـْطـَنِه وتيجانهــــــا ***** سُـبْحانْ ... مِـن سَـوَّالِـكْ الغِــــــرَّه وجْـبين ... فيه البَـدِرْ مِتـْمَــــــــــرَّا وحْواجْبـِكْ شُو حَرْقـَصِتْ ل ِسْيوف والصَّـدِر ... مِتل الشَّمس لـُو تـْعَـرَّا وعْـيون شِهلْ ... سْياجْها مَـلفـوف بْكِحْـلِه غـَريبـِه .. ما انـْعَـرَفْ سِـرَّا والوجـِه ضاوي بالحَـلا مَـوصـوف عا وَجـِنـْتـَيه ... ورود مِحْـمَــــــرَّه والأنِف مِن فِستـُقْ حَـلـَبْ مَقطوف حَبِّـة خـْزام ... مْرَصَّـعْ بْـــــــــدِرَّه عا شْـفافِـكْ النـَّحْلات عَمْ بتطـوف تِجْـني شَـهـِدْ ... وتـْحِـطـْ بالجَــرَّه وسْنانِكْ ... مْن ِ اللؤلؤ المَصفوف بْصِـدر الخـَزينِـه , وواقِـف الشَّـرَّا وفِستان , عا مَرْمَرْ نـَقِي مَـلفوف بْـزنـَّار ... بَيـن النـِّهـِـدْ والسِّــــرَّه كْريستين ... بالله تِعِمْلِي مَعْـروف لا تـْحَرقـْصِي كْتير الحَـلا مِنـْخاف يتـْرُكْ المَشتى ... وينتِشِـرْ بَـــــرَّا

الكاتب: القصيـدة رقم / 12 / | في: December 29, 2008 06:43:21 PM

ياصَيف ... وزّع عِطِـر من قمقـم البخـور *** فلفّش جعود الشمس عَ الأرض قرباني ليلك ... عَاكِتـْفـُو عَبايـي مْطـرَّزه بالنـُّـور *** فـَجْـرَكْ بـِعِبّـو زَهِرْ وغصون ضحكاني ليلك ياصيف المِضي , بْكَومِة حَلا مغمور *** نازل بمشتى الحلـو ... بتوجيـه ربّانـي حامل عاجـِنحَـكْ مَلاك من الصبايا الحـور *** حِضْيـِتْ بـِتاج الحـلا , بألفيـن وتمانـي طلـِّتْ عْـلينا فـَجـِرْ ... وعّـى عَتِـمْ مَقهـور *** سَحّب خيوط الطـَّمَع من عين طمعانـي بْشَـيّال غطى الصدر تحْتـُو دهب مصهور *** حَـدّو لنص الضهـر , وزنـود عمرانـي عازنـد , فيها جَـبل مشتى الحلـو مأسـور *** وعازنْـد موجة بحر طرطوس غرقانـي جَـنـْبُو اليميني ارتـَخى عازندها مَخْـمور *** وإدعِي لَ ألله, اليساري تِضربُو عْياني مفصّل عَاجسمِك ياملْكه وغامرك مسرور *** لَفـّـكْ بحِضـن العتـم يانجـم نورانــــي ممشوق شَـد الخصـر جُـوّاه سَـبع بحـور *** وزنبق بـِعِـبُّـو تِكِـي عَـا رخـام طليانـي وفوق الركاب ... ارتفع وتوهّـج البللـور *** من تحت صَفـِّة حلا ومن فـوق مليانـي مْبَـرْدَغ ْبـِكِمْ الـورد ... مَنـْقـُوع بالليكـور *** مَلْمَسْ حَريرو .. فـَريـد ومـا إلـو تانـي وجْـبين ... ضَـوّا بِعتمـة شعـرك المنتـور *** ولون العيـون انسحب من بـن سيلانـي والخَـدْ مسْحِة قـْزاز , الأنف نفـح عطور *** وشْـفاف , فيها عصير الصِّبـح وعّـانـي ترقص عـْراوي الحلق عالوجه لمّا يدور *** تحلم بزر الورد ... عَـا خـدود منصانـي صدرك عجينة دهب .. ربيان فيـه طيـور *** تِنـْدَه كْفـوف الشمس وتصيـح بـِردانـي ياكريستينـا .... حَـلاكـي لـَوَّع الجمهــور *** وخَـلاَّ لِجـان الحكـم ... تِنـْصـاع قنعانـي والتاج لِبْسِـكْ تََ صفّى موهَّج ومغـرور *** ولـَوما مالِبْسِـك ... بقـي حَبّـات عِـرياني حُبِّـك لِفـَنْ الرقص مش بس هَـز خصور *** ومين اللي قال الرقص مِشْ فـَنْ إنساني وعندك طموح وفِكِـر بالهندسه مسحـور *** انشــالله بـِدَربْ العِـلِـمْ ... تتـَّوَجـي تانــي قلام الورود انبرو يخطو بحلاكي سطور *** وأشْعَـرْ رجال الزجـل ... حكـام سهرانـي زهور القصيده على مَنبَـر شِعِـر وشعور *** بألـوان شَـتّى ... ورحيـق الـرُّوح لبنانـي ياكريستينا , تَ نِحْـيا العِـمِر كِلـُّو سـرور *** الكِلمِه الأخيره إلِكْ .. والشَّـور عالسانـي يَمّـا اتـْركيني .... عَ باب المَملكـه ناطـور *** يَمّا ارحميني وتـَعي .. عيشـي بشريانـي

الكاتب: القصيـدة رقم / 13 / | في: December 29, 2008 07:20:39 PM

بليلة مــن ليالي السحر الحيران ........... النجوم من السما و من عالينا شافت بالكفــرون راهب سكـران ........... عـــم يترنّح بكاســو ع روابينـا و بهالكفر مــا اعتبرتـــــو غلطــان ........... لأنـــو لمـح بعيونو كريستينـــا وانتشى من لمعة عيون الريحان ........... و نسي الترتيـل و رنّم غنانينـا وبنظرة منّا صـــار بإنجيلـو حيـران ........... وتاه عن دينو ولحق عقايد دينا ***** وقف صياد بسهام حلاكي مقتول ........... ع رمـل شاطئ بحر بعيد و مجهـــول وبلّش يرنــدح زجــل بدمعو مبلول ........... ومواويـــل بتتخطــى حدود المعقــول وبغنانيه كتـب حكايـــة بتقــــــول: ........... في ملكــة لــو زال المــوج ما بتــزول وبكل نغمة رنّت بقاعـــو المعــزول ........... ارتسمتلو صورتـك و صار فيّا مذهـول وحس بغيرة من شعرك المسدول........... وهــاج و تكبّــر و طلــع تالتــاج يطـول ولمّا وصّل لمستوى جبينك بالطول ........... صار غيمة وتحت إجريكي مطر مذلول ***** و لما الله خلــق الجمـــال كنتي أنتي ........... و رسمــــك وردة ع حجــار الكفــــرون و خلّى السكر يعقل و الصمت يحكي ........... و الشعــر يشهـــد ع رقصــك المجنون و السهـــر يسأل عنـــــــك إذا بتكبي ........... و مــن نـوم جفونك يصحيكي الحسون و لما القمر شاف حسنـــك صار كذبة ........... و هجر عتم ليلو و صار عندك مسجون ***** ولما بليلـــــة الملكات التــاج لبستي ........... عتم أيلول صار بلإلئ تاجك مرهون و الشُهب نزلت ع راسك عم تمشي ........... و تتمختر ع تاج ترقّى بليـــل مفتون و بعد هيك الحبر عنك ماقدر يحكــي ........... و ع سطور الحــلا ماقـــدر يزيد فنون لأنو أعظم أبجدية قدامـــك بتحنـــي ........... و قلام الوصف بتصير جســـم مكفون

الكاتب: القصيـدة رقم / 14 / | في: December 30, 2008 11:44:42 AM

محتــار شــو قلــك يـا أمورة.......الأكتـــر مــن الـنوّاب مشهـــورة من زغرتك كنتي ملكة الحي ....... ملكتي عقول الناس عالصورة ***** الماس تاجك والعقد مرجـان......و ذاب السحر من سحرك الفتان وبتأنسن عيونك ملوك الجان......و بتجنــن الانســـان بحضـــــورا ***** و يا صيف مشتى دغدغ الحلوين.......فيـك الحلا مزروع ببساتين كلمـــا بتكبر زهـــرة النسريـــن ...... بتملك حلا التيجان وقصورا ***** طلّي عا مسرح شعرنا طلّي ...... وببسمتك سعر الذهب غلّي بتسوســـح الشعّار هالطلــة......طلّة شمس ومشعشعة بنورا ***** و لولا قشعنــا قــدّك الميــــاس......يتمختر و يلوي قبال الناس بيعمل بعقل الوسوسة وسواس......وبيحزّر التحــــزير حـــزورة ***** و شــــلال شعرك منبعو سيّال......بيصب عالخصر الحلو الميّال وحابب مع النسمات يغزل شال......وعامــل مـــع الزنار كزذورة ***** والله قبـــل مــــا يخلقــــك فكّر......بتصميــم وبديكـــور مـا قصّر وجابك عا مشتى وقالبك كسّر......وعمّلك بدنيا الحب عصفورة ***** وطول وجمـال الرب أعطاكي ....... وملكة جمال العرش خلّاكي انتي الجبرتي القلب يهواكي.......وقلوبنــا بهالحــب مجبــــورة ***** وعنـدك ثقافة بالدني والدين......مـــا بتنحسب بكنوز وملايين وشعــرك جمالو كاتب عناوين......وخاطط قصايد شعر بسطورا ***** و مشتى الجمال منحسدو فيها......هيي القصيدة اللي بمعانيها خلّت شفــاف الــورد تحكيهـــــا......بنغمـــة حنونــة عـــم تغنيها ***** وحتى الجمال يضل يحميها....... و تا الكون كلو يفتخر فيها يا رب من مشتى وضواحيا...... ملكة جمال الكون بكرا تكون .....................وعالشمس يتعللقها صورة...................

الكاتب: القصيـدة رقم / 15 / | في: December 30, 2008 01:11:10 PM

تاج المشتى لبست مشالح نـور... إيديهـا ........... و صــار اللقـــب يرجف بعينيها و تمشي و تتنقّل بدون سيـاج ........... متل التياب الماشية عليها و يصيــر يكــرج تحتهــا الديبــاج ........... متل البحر يلطم عــا إجريها و موجة مــن اللولـو تنقّي تــاج ........... و تهدي الملْكة تاجها ليها ********* بتخايلِك... ليل.. و صلا... و نايات ........... و حدّك.. لحـن دوخـــان.. و مرنّح و حسون عم يتوشّح بنغمـات ...........و يوقف عليكي يترغـــل مْوشّح و مطرح ما بتدوري على الرقصات ........... بيصير.. يبــرم تحتــك المطـــرح مدري دْوختينا بخمس برمـــات ........... مدري عا كعبِك لابسي المسرح ********* و طيريـــن غطّــو عْلــى صدر مرتاح ........... إم و طفـــل عا بعضن التمّو لا خْيـــال بيناتـــن... و لا ســـوّاح ........... بيفــــوت.. كلما أكتر يزمّو لكن شو عم بدعــي علـى الوْشاح ........... يلّي قطع... عن تمها.. تِمّو انشاء الله بيشرب من نفس القداح ........... و إمو يسيّجهــا بميلـة وْشاح و يبكي بتاني ميل عا إمو ********* و بالبيت... إمّك ناطرة الأخبار........... و بالحفل... إنتي ناطرة التقدير عم تإسري الحاضر من الحِضّار ........... و بين الحواري... ترهجــي بكّير و عين المصوّر... تسبق الأنظار ........... و خوفو يضيّــــع لحظــة التأثير... يطلّع بعينو... مــن ورا منظـــار ........... تــا تْرفّ عنهــا عدْسة التصوير *********** و مْحرقص الإعـــلام ليلتها ........... و يسأل عن الملكة و هويّتها و من دون ما تسأل اللجنة مين ...........هيي بتعرف مين ملْكتهــا و جمهور... يتأوّه مــن فْساتين ........... و أول "وصيفة" مــن سعادتهـا.. متل الكأنو ملْكــة الحلويـــن ........... مَنْها كريستينا....وصيفتها..!! ********* و انتي المهرة و تاجــك الخيّال ........... ينخّي شوية و يهمـس بظنّك و ينده عليكي... بنغمة كريستال: ........... دخل العطاكي مجــدِك و فنِّك روحي افرطيني عالصدر سلسـال ........... يمّا اشلحيني جسر عا سِنّك أو وقفيني عالكعـــب خلخـــال ........... أهــون عليّـي توقفــي ولا روح أوقف عا ملْكة من بعد منّك

الكاتب: القصيدة رقــم /16 / | في: December 31, 2008 02:11:57 PM

كرســـتيبا حـــلــوة كـــلاّ......الورد بوجهـــــا متجلاّ أمّــــورة مــــتل الفلـّــــة.....برقـّـة كــّونـــــها الـــله صارت أيــة م الجـــــمال.....بيحسدها القمر الميــّال شعرا عــكــتافا شــــــلال.....ومن فوق جبينا مــدلاّ شوفوا محــلا طلــتـــــها.......ولون خدودا وبسمتها بتحرقص ب رقصـتــــها.......بنـات المـــشتى كـــــلاّ فنّانة بتــــهوى الديكـــور.....رسمــاتا متـــل البلـّــور وكلشي بيلمحها عالفــور......من نظرة بيــنشـــــدّلاّ وجنــــــاتا من لون الورد......والتاج مفصّـل عالقـّـد وجمـــــــالا مـا إلو حـــــد......القمر بِ ذاتـــــو قــلاّ يا حـــــــلوة جننتــــــــينا.......بالجــمال اســــحرتينا فتـــــحي صـــدرك ضمّينا........بركي لسّا منتحـــــلاّ أميرة تاجـــــــا من عــاج......لا بقلا تحكي بغــــناج بدي باركــــــــلا بالتـــــاج......وخلي ٍشعاري توصلاّ رح هنـّــيها وادعيــــــــلا.......وعن اعجابي احكيــلا وكل مبتــنجـــح عنــــــّيلا.......ومن حلـوانا اتحــــلاّ بالصّـــــورة شـــــفنا منها......معــــاني مفـــاتـنــــها يمكن ل مخبـّـــى منـــــهـا......لسّا اكتر متـــــحـــــلاّ

الكاتب: القصيـدة رقم / 17 / | في: December 31, 2008 05:49:05 PM

يا ملاكي ع سطح الليل نزلتي يا ملاكي ............. بجمال جديد جيتي من سماكي القمر مندوب عن جوقـة مدارو ............. بلســان النـــور تيترجـــم حلاكي ع ممرق بيتك محكّم مسـارو ............. بسهر ميمون ما بيطلــع بلاكي و صباح الخيــر بعيونــك نهــارو ............. فرح موشوم عازهـوة مساكي احمرّ الليــل و ابيضّ احمرارو ............. صبايا نجوم يمشـوا مـن وراكي ربيعك طلّ عم يصــدح كنارو ............. و نشيد القمح ترتيلــة صــلاكي الندى و موسوعة الأزهار صارو ............. جحافل للحلى بدورة مداكـــي الــــورد بكّير شرّع بــــاب دارو ............. تحتى يفوت نيسانو برباكـي و عندمــا مرّ رمشــك عازرارو ............. عبيرو فاح من دوحــة شذاكي و بعد مــا شافـــك بهيكل مزارو ............. أميرة سحر من طهرو عطاكي عبــاية هالحلــى و رصّع إطـارو ............. بعشق و قلوب تا يكسب رضاكي ع لونك صار عم يغـزل خمـــارو ............ يطرّز ليـــل بنجومــو و هـــداكي هداكي التاج تا صرتــي شعـارو ............. و جمال التـاج من روعــة صبـاكي و إذا أيلول ما عـاد اعتبــارو ............. وقت مــــــا يرجـــع ينقّي عداكي أنــــا متأكــــد بيبقــــى اختيارو ............. جمالـــك يـــا كرستينا و بيضلّو ع عرش السحر ما بتطلع سواكي

الكاتب: القصيـدة رقم / 18 / | في: December 31, 2008 07:00:25 PM

بالليل طلعو ع السهر حوَّشو نجوم السما لمّو عن تلال المسا ضو القمر من لون فضِّة ساقية و لون التلج فوق الجبال النائية و الزنبق العربش على دراجك بمشتى الحلو عِملو الحلا تاجك ******** و قديش انتي بتشبهي هالتاج يلي بحلا مشتى الحلو مشغول لمّا انسكب لون الشفق ع العاج فتّح خدودك ع ورد مخجول و تطليعتك .. غيبة شمس ع جبال فيها متل و عد بمدى مجهول شفافك متل جرح الكرز كرمال عنق البلغوى ميّال كسرت النجمة حالها بعقد الخرز و الريح صارت شال ******* ويا ملكة الصيف اللي مارق طيف ع بيوتنا ...إنطل الشتي بكرا شو اللي بيبقى من ليالي الكيف إلا الغنيّات و الذكرا و شواللي بيبقى من الكـَرِم للضيف إلا خوابي الشعر و الخمرا شو اللي بيبقى من ليالينا من عجقة الساحات من طلة الحلوين ع الطرقات شو اللي بيبقى من أسامينا شو اللي بيبقى من زهور الصيف إلا كرستينا

الكاتب: القصيـدة رقم /19 / | في: December 31, 2008 10:05:33 PM

لمّا الجَمال بْيـِعْزمك عا سِفـْرتو و بْـتلبسي ضَوْ القمر بْـتِفتح قـْصور المملكه بْواب الصَحوْ و درفه عَ شبّاك النـَظر و بْـتـِفرش اللهفه .. بسجّاد العطش !! و بْتمرقي متل المطر قوس القدح لابس خـْيالك هَالحلو حامل قناديل السَحر و بالليلْ لمّا بْتوصلي .. بيرجّع النجمه متل درب الخطر تا تقعدي .. وتَ تـْـقرّبي عَ المايده بيردّها متل السَهر بيبَـلـّشـوا.. ضيوف القصر من طلّتك يتضيّف نـْبيدُن سَكر من كتر ما بيتضيّفوا و بْيــِدلق خـْيالك على كاس الحَجَرْ !! من لهفتو عا وَهْجك.. قـْزاز الشـَمع بـِالهيكل بْشوفو انكسر... بتغمّض عْيونك على شِفّة صِبـِح بتدوقها شفّة وتر و بْتشرب الكِحْله على صَوتك صَلا وبـِتـْربّع جْراس السَهر وكلما السَمع يـِشْبَع خـَبر من صَوتك و تـِتـْلوّن عيونك صور قدّيش .. بتمنّى أنا وواقف عا شبّاك الدني .. وجّي سَفـَر شوف الحَلا سَهل بْسَما.. وشرشف ندي بْصِبح انغمر و متل ما بيجوع وجّك للحلا بتجوع للحُب البـَشر..

الكاتب: القصيـدة رقم /20 / | في: December 31, 2008 10:08:22 PM

الملكه الملاك ** الضّو مسودّة حلاكي وعالقزاز عبّق ندي زنبق تْشَتَّت تركواز طرطش سما وجّك سرح فوق الجفون كحله خطفها الزّهر روّبها كواز و غبّ القمر دورة حياتو من عيون بتغفى بْعتابا الليل بتصبّح ب جاز بتحلم بعكس الوقت بتمشّق غصون زيتون قدْس اللون عالوحة حجاز والخدّ ! .. كلّما بيقدح نبيد الجنون بيدحك عروس بْتِلبُس سْنانك جهاز والتّاج رفّة جِنْح نوراني حنون بينزل كأنّو الصوت عا نهر الجمال الرملو عزيز وكلّ موجاتو عزاز

الكاتب: القصيـدة رقم /21/ | في: January 02, 2009 10:28:08 AM

صيفك يامشتى الحلو بهجه للنظر ........... صيفك طفل وبيضحك ل أمو السِني بليلك الدنيا لو تعبت من السهر ........... ع برود نسماتك بتغفّي الدني ضو القمر بليلك العالم سََحَر ........... وافتكرو نورو لجمالك عنْوَني وحيث المراكب نزلو ع سطح القمر ........... طمحتي لنور الشمس والنجم السَني نجمك كريستين بوقت ما بان وظهر ........... فرحت المشتى..تحقق الحلم الهني و ليتمّ قصدو الرب ويوعو هالبشر ........... قديش خالقهن بخلقو معتني حفلة جمالك عالملا ذاعو الخبر ........... ودعيو وصيفات ال بعمر السوسني واجتمعت الحكام والحكم انتشر: ........... لصوب هامك تاج بدو ينحني وكان الحكم معروف.. من حيث النظر ........... بيميّز الحلوين ع مسافة سِني ------------------------- يعني الجمال عليكي طبّقو قياسو ........... وحطو عهامك تاج من جوهر تحرنق التاج وجوهرو وماسو ........... انتي اللي ببسمة مجوهرة أكتر ودشّر عند ما شافك هالحكم كاسو ........... وصار بنظرتو ليكي يتوجّع ويسكر ------------------------- وشكلو عليكي ورود من قبلا اختصر ........... خدّك لوان الورد وعطور الوجود النور وجهك وقتها شع ونشر ........... خفنا لنورك يحرق بوهجو الورود لولا الندي من وجهك بوقتا عبر ........... وسقسق على الوردات من هاك الخدود ------------------------- إن قمتي رقصتي اتذكري بكرا ........... عينك عالفراشة من رقصتك لاتغار هالأرض لولا تضلّا تبرّم بخصرا ........... لاهالعمر ماشي ولاليل لحق نهار وتبرمي لفّي..يطير شعرك ويقرا ........... قصة جعودو ويفضح الأسرار وبغير لفّي ..غمزاتك الخطرا ........... تغمزا عيونك.. وكلنا ننهار ------------------------- وبدعي بصنعة التصميم يوفقك الله........... وتترجمي أفكارك وخصب الخيال فكّري بديكور لايق للعرب كلا ........... يمثّل رجوله صارت برسم السؤال لكن حرب تموز..غزّة ونصرالله ........... عطيو أمل تنقول لسا في مجال إلا البطوله بشعوب اليوم تتجلا ........... وتلاقي رجال تليق لهيكي جمال ------------------------- كريستين..لاتفكري خلطنا الأمور ........... تا صورة جمالك والسياسة ندرسا الشاعر خلق إحساس..دماتو شعور ........... حزن وفرح كل الصور يتحسسا بهيدا الوقت ريشتي إلك تكتب سطور ........... وغزّة جريحة والعدو مدنّسا وحتى الدني توقَف حروبا والشرور ........... ويحمي شعوب الأرض من حزن وأسا قومي معي ياحلوتي لرب الدهور ........... نركع إلو نصلّي إلو صبح ومسا لنّو جمال النفس باقي عالعصور ........... بكرا الجسم بيقضّي عمرو..بينتسا ------------------------- بعدك صبية بأول العمر الهني ........... لبستي بجمالك التاج والجوهر ضلّي بهالعمر جدّي واعتني ........... تاتنضجي وتجوهري أكتر علم وثقافة لكنوزن اقتني ........... هنّي تيجان المملكة الأكبر صحة جسم ومن الروح بدعي ........... تغتني ومن بعضن يغارو جوهر ومنظر

الكاتب: القصيـدة رقم / 22/ | في: January 05, 2009 11:16:32 AM

آه يا هالتاج شو بيغار !! و بيحسدك أيلول عا آدار نقّط دهب وجـّك عَ خد الإيد متل الندي اللي نقـّط من النار غروبـَك يا وهج الشمس عَ القرميد و صبحـَك يا أحمر عا زهر جلنار عا شـَعرها نازل قصيد جديد نـَزلة سما عا شمعدان الغار .. شِفـْتك سَفـَر نجمه بَلا مواعيد و متل الصِدف واقف عَ باب الدار من شَعرها صبـّيت كاس نبيد و خلـّصت خصله و صرت صب نهار يا تاج .. كيف بْتلبـِسَك بالعيد ؟؟ و كيف حْمِلـِت وهج و حلا و قمار ؟؟ طـلـّع و قلـّي من بعد تنهيد قدّيش .. !! بـِتـْغاروا يا هالشعّار .... لا تسأل النجمه عَ ضو بعيد .. و ليش القيامه بتلبس المسمار !! و إبن الله بيحملو النجـّار !!

الكاتب: القصيـدة رقم /23/ | في: January 05, 2009 11:18:27 AM

ملكة جمال الصيف من قبل ما جبين الصلا يعرق حلا ويمرق بِ بالو طيف ومن قبل ما قلبو من السحر انتلا وتلج الصبح بالكاس شفّق ونجلا ويسكربليلة كًيف ويرن سيف بسيف وتشهق المشتى ياهلا بملكة جمال الصيف *** وعينين بوابة مدا بتضيق عَ وسعن دني كونين شو ألهن صدى وضحكة ربيع مولدني لونين غفيو عَ الهَدى ووعيو بلوحه ملوّني *** وشفاف لعبة طفلتين زغار بيوعا الصبا فيهن على حالو تركو الطفولي تحتق بالنّار ونيرونهن روما الحلا قبالو وتوشوشو وتفلفشو الأسرار وقلو ماعدنا زغار صرنا كبار علينا القمر عم ينشغل بالو " عَطّشونا وطرطشونا خبار وكلمات مش كلّن بينقالو" *** لملم عبيرك من حروف الشوق ياورد حتّى للقصايد تنسما ويغفا عشب دعساتها مسرح دمى ويعرق قمر همساتها من الذّوق " حلوي السّما لّي تحت ... بس الفوق أحلى من الفتّح بعينيها سما " *** تاجك شموخ الصيف عرشك عزْ ولونك تغنّج عَ شفق أيلول خدودك عَ دقرا دمّها بينزْ من لونها الزنبق فتح منزول ومن قبل ما كاسك شفافو تمزْ فصّل الشمس ولبّسك مريول ومرجوحتك بلّش بإ يدو يهزْ " وشو مايقول اللورد عنّو يقول"

الكاتب: القصيـدة رقم / 24 / | في: January 05, 2009 11:32:06 AM

جرس منتور نحنا جمال بلادنا مشهــور .......... حــولو الخبــر دورة قمر بيدور بالشرق صورة ملبقا تلبيق .......... وللشعر متل الغصن للعصفور ***** يا كرستينا السحر والتشويق .......... ع مبسمـــك بقلوبنا منظور اسمك لوحدو صــار ألنـا رفيق .......... فنجان قهوة مع صباح النور ***** تكّون جمالك بالجمال يليق .......... حلوي وعطاكي الشرع والدستور تاج الحلا تمييز مش تفريق .......... والتـاج كـرم بعهـــدة الناطــــــــور ***** أيا قصيــدة خمــر للتعتيق .......... بتكون ملكــة ع رأي الجمهور كرمالك بتستاهل التعليق .......... ع دلبة المشتى جرس منتور ***** كلشي ولا خلق المرايا يضيق .......... دوبي غزل بين البنات الحور شو هـ الحلا يا ملكة الفينيـق .......... بكــرا بيجـي جوبيتر الأولمب وبيلتقيكي عَ شواطي صور

الكاتب: القصيـدة رقم / 25 / | في: January 06, 2009 08:40:42 PM

ولو شــــاف شعراتك صبايا مدرجين ........... شلحات ليل علـى كتافـــــــك ينزلــو بيصير يشهـــق شهر من كتر الأنين ........... وبيقولـــــو ريتــــن ع ايديـــــي تجدلو ومن حلا شفافك الخلقــــو محمرين ........... وع خدودك التفـــاح بعــــــدو بأولـــــو ومن حور عينيكي العسـل لمكحلين ........... صارو الطيــــــــور بنظرتــــك يتغزلــــو وحتى الشياطين لي خلقو بلا حنين ........... رجعو لعنـــــــد الخـــالق وسجدو إلو هني وملايكة الجمـــال مجمعيـــــن ........... صارو عـــــــم يصلــــــو إلـــك ويرتلـــو وقت اللي شافوكو زهــور الياسمين ........... وكيــــــف مـــا بتتمايلـــي بيتمايلــــو شدتهن الدهشـــي وقفـــو ملبكين ........... وصارو عليكـي ع السكــــت يتسائلو ما أعظمك يا خالـــق الكــون المبين ........... معقول تخلق سحــر أحلى من الحلو من وقتها كرامي إلك يــا كريستيـن ........... صارت المشتى أسمها مشتى الحلو ولو ما كنت صغير تا سبقت السنين ........... ومن لوح صدري الحد قلبي عملت تاج وتوجتك الملكي عَ كون بكاملو

الكاتب: إدارة مشتاوي | في: January 06, 2009 08:43:14 PM

السادة شعراء موقع مشتاوي المحترمين : بداية عذراً على فتح المشاركة لبضعة ايام بعد المدة المحددة , وذلك نزولاً عند رجاء خاص من قبل بعض الشعراء . كما نشكر جميع من شارك في المسابقة ونتمنى للجميع التوفيق , ونعلن عن إنتهاء المشاركة . وسنقوم في الفترة القريبة بإرسال جميع المشاركات إلى لجنة التحكيم , وسنعلمكم بكل جديد في حينه تقبلوا بالغ الشكر والإحترام . إدارة الموقع